શેરધારકોને ભેટ, મારુતિ તેના ઇતિહાસમાં સૌથી મોટું ડિવિડન્ડ આપશે

દેશની સૌથી મોટી કાર મેન્યુફેક્ચરિંગ કંપની મારુતિ સુઝુકી ઈન્ડિયા લિમિટેડે ડિવિડન્ડ જાહેર કર્યું છે. કંપની તેના શેરધારકોને દરેક શેર પર 125 રૂપિયાનું ડિવિડન્ડ આપશે. કંપનીના બોર્ડે આજે 26 એપ્રિલે 31 માર્ચ, 2024ના રોજ પૂરા થતા નાણાકીય વર્ષ માટે શેર દીઠ રૂ. 125ના અંતિમ ડિવિડન્ડને મંજૂરી આપી હતી. કંપનીના ઈતિહાસમાં આ સૌથી મોટું ડિવિડન્ડ છે. ઓટોમોબાઈલ કંપની મારુતિ સુઝુકીએ જાન્યુઆરી-માર્ચ ક્વાર્ટરના પરિણામો જાહેર કર્યા છે. કંપનીએ નાણાકીય વર્ષ 2023-24ના ચોથા ક્વાર્ટરમાં રૂ. 3,877.8 કરોડનો ચોખ્ખો નફો કર્યો છે. મારુતિએ એક નિવેદનમાં જણાવ્યું હતું કે, ડિવિડન્ડની દરખાસ્તને આગામી વાર્ષિક સામાન્ય સભામાં શેરધારકોની મંજૂરીની જરૂર પડશે.

મારુતિ સુઝુકી ઈન્ડિયા લિમિટેડે 8 જુલાઈ 2004થી અત્યાર સુધી 20 વખત ડિવિડન્ડ જાહેર કર્યું છે. છેલ્લા 12 મહિનામાં કંપનીએ શેર દીઠ રૂ. 90નું ઇક્વિટી ડિવિડન્ડ જાહેર કર્યું છે. મારુતિ સુઝુકીની વર્તમાન શેર કિંમત પર ડિવિડન્ડ યીલ્ડ 0.71 ટકા છે. કંપનીએ અગાઉ 2023માં 90 રૂપિયા અને 2022માં 60 રૂપિયાનું ડિવિડન્ડ બહાર પાડ્યું હતું. ઓટોમોબાઈલ કંપનીની શેર દીઠ કમાણી પણ વધીને રૂ. 123.34 થઈ ગઈ છે, જે ગયા નાણાકીય વર્ષના સમાન ક્વાર્ટરમાં રૂ. 86.85 હતી.

મારુતિ સુઝુકી ઇન્ડિયાએ પણ FY24ના ચોથા ક્વાર્ટરના પરિણામો જાહેર કર્યા છે. કંપનીએ માર્ચ ક્વાર્ટરમાં રૂ. 3,878 કરોડનો ચોખ્ખો નફો નોંધાવ્યો હતો, જે અગાઉના વર્ષના સમાન ગાળાની તુલનામાં 48 ટકા વધુ છે. આ સમયગાળા દરમિયાન, કંપનીએ રૂ. 38235 કરોડની આવક હાંસલ કરી હતી, જે વાર્ષિક ધોરણે 19 ટકા વધુ હતી. જો કે, આ વિશ્લેષકોના અંદાજ કરતાં નબળું છે.

નવ બ્રોકરેજ કંપનીઓએ રૂ. 38,772 કરોડની આવક પર રૂ. 3,916 કરોડનો ચોખ્ખો નફો અંદાજ કર્યો હતો. કંપનીના શેરમાં આજે 1.70 ટકાનો ઘટાડો થયો છે અને શેર રૂ. 12687.05 પર બંધ થયો છે. બજાર બંધ થયા પછી કંપનીએ પરિણામો જાહેર કર્યા છે.

મારુતિ સુઝુકીના ચેરમેન RC ભાર્ગવે જણાવ્યું હતું કે, સુઝુકી મોટર ગુજરાતનું ચોથું યુનિટ આ વર્ષના અંત સુધીમાં ઉત્પાદન શરૂ કરશે. કંપનીએ પ્રથમ વખત 20 લાખ યુનિટના વેચાણનો આંકડો પણ હાંસલ કર્યો છે. આ ઉપરાંત, કંપની સતત ત્રીજા વર્ષે સૌથી વધુ વાહનોની નિકાસકાર રહી છે.

નોંધ: ફક્ત માહિતીના હેતુઓ માટે જ શેરબજારના સમાચાર પ્રદાન કર્યા છે એને શેરમાં રોકાણની સલાહ તરીકે ન ગણી શકાય. રોકાણના કોઈપણ નિર્ણયો લેતા પહેલા તમારે તમારા નાણાકીય સલાહકારની સલાહ અવશ્ય લેવી.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.